岩岩有人講開依隻game，咁岩又係一隻我的最愛之一，
所以就寫吓佢啦.....^^
相信有玩過《零》系列嘅人都一定會認同此game非常之恐怖。
而第二集《零～紅蝶》，在日本被喻為史上最恐怖遊戲第一位(第2係死魂曲，第3唔知)，
此系列一共有3集，當然地我都係集集唔同版本都有買，xbox我有1~2集，ps2有2~3集。
可惜嘅係xbox版並冇推出第3集，因為在聲晝方面都一定係xbox比ps2優勝，而最重要係xbox版有5.1，臨場感絕對冇得頂，ps2版雖然被比下去，但鬼叫ps2出先，所以都係第一時間玩重要D。
《零》故事係以日本真人真事改編而成，當年推出時真係嚇親唔少人，而香產電影《咒樂園》亦以此為故事架構。
其實故事本身係相當單薄，畢竟真人真事總唔會有咩新意，妹妹搵哥哥就係咁簡單。
但遊戲系統就相當出色，一個手無寸鐵嘅女仔，只可以用一部有吸魂功能嘅相機去不斷吸魂，冇菲林就為有走........
途中可以搵到唔同嘅鏡頭同道具去升級你部相機，以做成最大"殺傷力"。而當影到敵人最近嘅大頭再加上鏡頭顯示嘅封印(對焦)儲最大時，即殺傷力最大，但亦係最易中招嘅時間，所以最有效攻擊法就係先確保背後有足夠地方後退，之後一路對焦一路後退，直至儲滿封印先幫"佢"影張大特寫....^^記住留意要用最勁果隻菲林喎。
不過有招連環快拍，唔記得係第幾集先開始有，相當好用.....
未係大頭，等多陣先影啦......
《零～紅蝶》，續上集好評而推出嘅續集，但跟上集故事全冇關係，而系統全保留，當然道具增加左，畫面亦更加成熟，故事亦係3集零之中最好嘅一集。
今集要控制兩個主角，感覺上係多餘左d，純粹為左故事而已。
而《零～紅蝶》在XBOX版本中，亦加入第一身視點(FPS)名為Director's Cut Mode，再加上5.1聲道，真係現場一樣......而且又加入更換水著。
不過今集好多"敵人"都唔會成日俾魂面你影，所以要把握時機。
第一身視點，隻鬼在背後時後置喇叭出聲，你都咪話唔激......
嘩....依個特寫一定好高分。
水著都幾Cute架...^^
《零～刺青の聲》，當時玩依隻game果時我係零晨一人左房裡玩，好鬼驚。
故事只可以講係夾梗將前兩集加於此作中而成為《零》嘅完結。
主角要在夢中同現實兩個世界搵答案，都可說係有點新意。雖然故事單薄及遊戲時間亦比較短，但遊戲性同臨場感絕對係三集最強。
而今集可以使用3個角色，包括本集主角，第一集主角同第二集果兩姊妹嘅哥哥，各有唔同能力，而相機攻擊力亦有所不同，畫面亦大幅度提升。
由於"敵人"在最凶狠時身上會出現刺青，同樣地亦係大特寫時候........
而敵人攻擊亦有所提升，尤其兩母女就更是難應付，因為一個高，另一個到你條腰，如果一齊攻擊的確有d難搞。
而另外一隻只會出現在地台底(即係d日本舊屋下面會離地幾尺果個位，唔知叫咩)嘅女鬼，我問個個玩過此game嘅人都好驚同佢打(影佢)，唔係因為佢勁，而係因為佢個樣好嚇人，加上只係一條路嘅困獸鬥，我有時見到佢真係避開唔直接同佢打而走人........
刺青滿身係最佳時機。
依個就係大佬喇.....
兩母女其實好慘，佢地只係想你幫佢地而已.....
依隻就係地台底木鬼，當佢滿面刺青時就更加恐怖，正式玩果時真係唔敢望佢.......
《零》在日本推出過一隻手機版叫做《REAL．零》，玩法同家用版差唔多，有趣嘅係要用手機鏡頭玩，我諗大家都明佢玩咩喇....^^
沒有留言:
張貼留言