到我紅燈喇...^^

尋日買左隻KUF諗住可以online同人玩，尋晚試左一陣，
點知今日開機玩，玩左一陣花晒畫面，重開再試，點知出現一紅燈，畫面顯示E74(即影像問題)，試過抆晒D線再開都係唔得，咁之前D人話三紅先至唔駛俾保養費，咁一紅咪要俾錢....
打去MS問，佢地幫我約左1月8日換機，都係唔駛錢(放心晒)，仲俾翻一個月live我(梗係要啦，成個月冇live用)，原來唔只三紅免費保，原來E74都係免費.....實在太好喇...^^

其實之前絲絲同的士佢地三紅換機，我就成日都話點解我未三紅，
其實我唔係串佢地架，事實上我都真係想換機，因為新一批機會用新DVD ROM同新CPU，你都咪話唔心動，所以壞機對我黎講係一件開心事，只係唔著時，因為1月8日先拎得，咁個個都爆晒KUF，仲邊有人同我玩4人合作呀，買佢都係因為咁之嘛....~.-

隻KUF好多地方都炒，平均$329(原價$299)，可能D鋪唔知佢咁好買，所以入少左，好多地方都冇貨，唔炒有鬼咩...
不過樓下個姐姐好人，唔炒俾我，生食$290，只可惜依加玩唔到....

肥仔高達又係必買，我份人就怪怪地，4隻天使，我最鍾意肥仔。
可能因為佢唔得人鍾意，覺得佢可憐掛....^^

點都好，依加冇X360，咁我可以砌模型，都未嘗唔係一件好事...^^
而且仲有wiifit都未得閒玩.......