你愛野豬嗎？～MG100

我知唔係好多人鍾意佢，當初見到佢嘅設定公佈時，我亦一樣頂佢唔順。
因此一直我都叫佢做野豬高達。

早前有傳MG100係佢，好多人都唔信，
就算笨大正式公佈係turn A，連官方相都出埋，都仲係有人唔面對現實。
講真，睇笨大之前嘅宣傳，就知MG100非佢莫屬。
所以我唔覺得有咩出奇，只希望katoki新設定可以令佢更好睇。

實物出現之後，我冇覺得失望，
而且katoki亦將turn A原設定嘅線條同結構都完全表現晒落模型上，實在令人高興。
由於設計者係一個機械工程師，所以佢嘅圓，線條，關節等，都有一定實際計算，
遠不同日本人只會空想嘅機械人(高達)設計。
即使至今我仍然唔接受佢係一台高達，但在於機械人上，佢係一台相當實在嘅機械人模型。

成盒模型冇偷懶，左右手腳都係獨立零件，絕冇複用。
而且仲有本turn A書仔。
以佢個盒嘅size黎睇(同渣古2.0一樣)，應該係$200左右，
所以我$219買都叫公道，
當然，可能因為佢野豬樣嘅關係，因此應該好快又有新低都唔出奇。