玩模可玩: 神級動作遊戲～忍者外傳(+忍龍2新圖)

自從我開左個blog，有幾樣野我好想寫，一係講鬼，二係講game。
不過依加都係充斥住模型玩具。

《忍者外傳/忍者龍劍傳（Ninja Gaiden）》，以下簡稱「忍龍」。
尋日終於打爆左，原來自己都神奇，50隻金甲蟲我仲記得響邊，不過差一粒神命珠搵唔齊。

忍龍係XBOX獨占遊戲，所以並唔係好多人玩過。
PS2有戰神，XBOX就有忍龍，可想而知忍龍地位係幾高。
不過依加PS3玩家都可以玩到《忍者外傳Σ（Ninja Gaiden Sigma）》，不過......
在gamespot評分為9.4，冇記錯，當年係最高分。戰神1亦輸在之下(9.3)。
有人話評分好主觀，但我支持gamespot評分，因為除網站外，各網友都可以訐分，我都係其中一人。

動作遊戲首要就係爽快同多采多姿嘅畫面，忍龍依方面可說係完美之極。
由於主角「隼仁（Ryu）」有著格鬥遊戲《DEAD OR ALIVE（DOA）》嘅招式架構，
因此，只要熟識出招，基本上就等於將DOA嘅隼仁活現於動作遊戲中。而每種武器亦有唔同招式，亦可升級，尤其把爆笑木刀......^^。
所以玩此遊戲唔係只拳腳跳咁簡單，係需要組合出不同殺敵之技，而且亦要在適當時轉換武器，以發揮最有效攻擊。而且就算一般嘍囉都唔係身手不凡，唔似得戰神般的豆腐人任你表現。因此亦有一定戰略性。
而DOA中嘅名技「飯鋼落」亦係主力攻擊之一，如冇一身好武功，我諗都幾難爆機。
初接觸時，就係因為我以為係"拳腳交"，俾敵人秒殺，所以放棄過。

至於畫面，相信已經係XBOX極限，由圖片中可以睇到，當年畫面已到如此地步。
如下圖中嘅靚女「Rachel」，亦係即時運算出黎，幾咁利害。
因為X360玩舊game有提升畫面同反鋸牙，而ps3都做唔到完全反鋸牙。
放落去X360度玩，真係同依加D遊戲畫面差冇幾(不過播片冇得升.....)。

依兩隻「重鬼卿(即係敵人大佬輩)」，係之後先加上去嘅人物，
在忍龍要download先有。但係我幾鍾意，好型。

忍龍總共推出左三個版本(係版本唔係集)，越新版本是否代表更完美更完整，
以下為大家分析一吓。

忍者外傳（Ninja Gaiden）
XBOX / gamespot評分9.4

網上好多人都話佢係一隻相當變態嘅動作遊戲，事實亦的確如此。
而成個遊戲最難打嘅大佬其實係第一版，相信玩過嘅都會認同。
佢冇話D大佬越黎越難打，只係睇你武功高唔高戰略有幾好。
大致上面都講過喇，所以唔多講。

之後推出下載項目，包括新武器「無想新月棍」。
加入左主線完結之後嘅故事，作一個補完，
亦有比故事更變態嘅任務模式。

用連續技可以輕易解決佢。

「絕技(爆氣攻擊)」好精彩架，而且每種武器嘅絕技都唔同。

新武器～無想新月棍

忍者外傳～黑之章（Ninja Gaiden BLACK）
XBOX / gamespot評分9.4

畫面同上一版一樣，不過視點修改過，之前打打吓轉視點如果上到頭頂好易出事。
此版視點自然好多，不過唔係我地D fans都未必覺。
之前使用「絕技(爆氣)」一定要吸「精髓(魂)」先可以進階(分2階段)，今次用時間/吸魂。
武器「妖刀鬼彻」再唔會吸自己d血，所以回復護手「命運之輪」都冇左。
「無想新月棍」變成正式武器。
加入任務模式，不過要爆機先有。
主線故事加入左「綾音」嘅劇情，但冇爆機後故事。
有新衫可以換。

其實黑之章係比之前易玩左，因為隨時可以「爆氣」，所以殺敵比較輕鬆。
但相對地，冇左「命運之輪」，以前可以企定等回血，依加一定要用回復藥喇。

本來係主角嘅衫，而今次故事中佢係敵人之一。

本來故事模式中，大佬戰只係一對一，但任務模式有其他敵人，好變態呀......

忍者外傳Σ（Ninja Gaiden Sigma）
PS3 / gamespot評分9.0

DOA開發人板垣伴信講過，有佢一日，都唔會將DOA系遊戲移植到SONY機上。
不過條友俾人告完之後好似冇唔大話事權，所以忍龍得以在PS3上登場。
不過隻GAME唔係佢移植，只係交俾兩個剛升格嘅人操刀，結果如何.....
gamespot評分只有9.0，而網友評分亦衰到8.幾.....似乎gamespot仲要俾d面sony....
本來以為只加D新版圖應該冇問題，誰知PS3玩家亦冇法玩到忍龍嘅精髓。

視點修改過，不過轉到你頭暈，仲衰過第一版.....
今次交代左「Rachel」嘅劇情，應該已經將忍龍主線故事最完整嘅一集喇。

PS3版主要賣點係可使用女主角「Rachel」，不過佢行路就真係好搞笑，我諗係因為唔係出自板垣之手吧。
而Rachel姐亦明顯比之前更搖乳(日本仔真係.....)，不過都只係出幾場交代劇情，所以攻擊冇咩變化。不過....佢可以隨時換髮型。
PS3版因有動態感應，所以出忍法時只要起勢咁上下搖個手掣就會越搖越勁。
畫面細緻左，貼圖都唔同，不過多邊型同以前冇分別，只係PS3嘅圖像處理令佢更立體而已。
但出奇地在使用「鬼火」對食人魚時會有拖慢情況，相信只係開發問題，同機能冇關嘅......

儲氣、爆氣同斬等都冇晒D光影，取而代之係用氣黎表達，好唔好就見仁見智，但氣勢明顯冇咁勁。
新武器「嚴龍+伐虎」係二刀流武器，在前半段可以用黎做主力，而且爆氣會出現大旋風，對巨大敵人相當有用。
今次好多大佬都強左，比之前難對付，感覺上平衡左。
好多特殊技等都容易左，如似「水上飄」今版真係好似平地咁，之前要一吓一吓噤。
而且有D在之前比較難過嘅地方，亦改得簡單左，例如針橋變左做水，行過去就得喇。
最大獲係load碟太多，而且次次都幾秒，行一條街load兩三次，唔扣分都唔得啦。

本來TECMO話會將所有CG動畫用PS3重新即時運算，但其實得第一版與第二版之間。
之後都係用XBOX版D CG，仲要係冇升解像度.........
「綾音」個樣唔同左.....
隻GAME比之前易玩好多，D回復道具多都笑，所以條能源好大碌。
雖然如此，但仍然係一隻唔錯嘅遊戲，其實本版同戰神唔差太遠(只要冇XBOX版咁好玩)。

Rachel姐，D人叫佢SM女皇，佢把野都幾勁吓。