醜男天下～戰神︰奧林帕斯之鏈

亞媽度冇野玩，好在我拎埋PSP去，否則真係悶Q死.....
隻game比我預期中好，因為之前一直都覺得PSP嘅操作一定冇PS2個手掣咁好。
但玩落又唔係咁差啫，只係要少少時間去習慣吓囉。
基本上用手提機玩動作game指頭一定難受，好在流程都只係3~4個鐘，否則好似DMC咁長就真係痛死呀。
今集其實係PS2版戰神嘅前傳故事，即係《戰神︰奧林帕斯之鏈》(PSP) ->《戰神》(PS2) ->《戰神2︰聖劍神罰》(PS2)，吓一集應該就係PS3喇。
畫面其實都唔駛多講，都係一個靚字，同PS2版差唔多，而且流暢度不減，絕對係PSP上難得嘅一隻遊戲。
我覺得今集完整度比《戰神2》更高，因為上一集太過集中在動作上，而解謎部份變得單薄，而今集則各方平衡都好左。冇咩冷場。
而之前兩集主角所用嘅武器都係集中在雙菜刀身上，即使有其實武器，相信大家都唔多用。但今集比較可靠嘅新武器盾牌用手套確係異常好用，所以要睇情況經常轉武器，而且在升級上亦唔可以再集中在雙菜刀上，到後段時升級手套至重要。

不過有D地方提示不足就真係扣分啦，好似有一part係要在2樓打橫行先過到，但如果你之前miss左山崖個提示，分分鐘唔知可以打橫行，咁就卡住左囉......
有一度又係，拉條梯級出黎，但又冇提示入口位置，睇唔到又要行黎行去囉.......
招式上，雙菜刀依舊華麗，但問題係唔可以死攻，因為某d敵人竟然可以在你斬斬吓之吓還拖，真係好有問題。
而另一敗筆亦係出在雙菜刀上，在一般情況下，只要跳高噤三角掣(空中斬)，敵人係打你唔到，因為d敵人唔識跳高攻擊，另外亦可以用level 3手套跳高+L+儲氣三角掣，絕對橫強.....跳高攻擊的確係玩晒，但令成個遊戲難度及挑戰性大減。

隻game爽快度相當高，如果可以改改個攻擊判定會更加好。
但點講都好，世界上冇100%好遊戲，論遊戲性黎講依隻絕對係手提機上最強嘅動作遊戲......^^